Pinterest, denon ahotan dagoen azken zerbitzua

Azkenaldian leku guztietan hitzegiten da Pinterest zerbitzuari buruz. Modan dagoen zerbitzua da dudarik gabe, eta zihurrenik gero eta jende gehiagok emango du izena webgune honetan, gutxienez bere inguruan dagoen hype guztia mantentzen den bitartean.

Zer da Pinterest? Nolabait esateko, aspalditik ezagunak diren zenbait zerbitzuren garapena da, hots Delicious. Pinterestekin erabiltzaile bakoitzak sarean zehar bere interesa piztu duen eduki oro ipini dezake bere horman, bai hurrengo batean eduki hori aurkitzea errazteko edo beste pertsonekin partekatzeko.

Zergatik orduan horrelako arrakasta? Ez al da aspaldidanik existitzen diren zerbitzuen antzeko zerbait? Beharbada bai, baina orain arte beste zerbitzuek eduki ez duten ideia bat erabiltzen du: diseinuari ematen zaion garrantzia.

Partekatutako edukiak oso formatu bisualean agertzen dira, begiarentzako webgune erakargarria bihurtuz. Erabiltzaileek proposatutako eduki orok argazki bat eduki beharra dauka, hauen horma galeria antzeko bat bihurtuz. Sarean, ordea, oso ondo diseinatutako milaka webgune daude, Pinterest honekin bakarrik zerbitzu arrakastatsua bihurtu dela esaten al gabiltza?

Momentuz gauzak oso ondo doazkio, gero eta erabiltzaile gehiago ditu eta, are eta garrantzitsuago, sareko bazter guztietan berari buruz hitz egitea lortzen ari da. Sareko begiradak erakarri nahi dutenendako kontutan hartzeko trafiko sortzailea izan daiteke, Facebook, Google+ edo Twitter handien ondoan.

Zerbitzu honekin, gainera, interneten sortzen diren zerbitzu guztiek duten prozesua ez da bete. Normalean lehenik eta behin early adopter bezala ezagututako erabiltzaileak sartzen dira tresna berria erabiltzera, teknologikoki perfil altuago bat duten pertsonak alegia. Hauek iritsi eta gero, webguneek izaten duten erronka handiena gainontzeko jende guztia erakartzea izaten da, askok lortzen ez duten gauza.

Pinteresten kasuan aldiz gauzak ez dira honela gertatu, baizik eta sektore jakin batekin erlazionatutako jendearen artean indartsu egin da: moda, diseinua, dekorazioa eta abar. Beste ezaugarri bitxi bat bere erabiltzaileen portzentai handiena emakumezkoek eratutakoa dela da, sarean zerbitzu gutxik esan dezaketen zerbait. Egia esan, ez dakit desberdintasun hauek ezaugarri estetikoetan ipinitako garrantziak sortuak izan diren, baina ezaugarri honek lortu duena, munduaren aurrean euren sorkuntzak ipintzeko helburua duten artisten artean oso azkar igotzen dabilela Pinteresten erabilera.

Ez dakit azkenean Facebook edo Twitter zerbitzuek lortu duten arrakasta lortuko duen, baina dagoeneko aztertua izatea merezi duen fenomeno bat dela ezin da ukatu.

Estekak:
    Enrique Dans: "Pinteresante", mi columna en expansión
    Error500: Pinterest, amor a primera vista

Kontuz sekretuak edukitzearekin, arriskutsu izan zintezke eta

Askotan entzun ditugu politikariak terrorismoaren argudioa erabiltzen gure eskubideen murrizketa suposatzen duen zerbait egitea justifikatzeko. Internet arloan ugariak izan dira kasu hauek. Beti gure segurtasuna bermatzeko neurriak direla esaten dute herriarengan beldurra sortzen duten bitartean, jendearen eskubideen murrizketaren aurkako protestak txikiagotzeko. Baina beldurrean oinarritutako edozein ekintza gure onerako izatea oso dudagarria den zerbait dela uste dut.

Ildo honetan doa FBIren azken ideia. Izan ere terrorismoaren kontrako borrokan pertsona orok bere laguntza ematen laguntzeko gida bat atera dute. Gida honekin gure lagun, ezagun edo auzotarren aurrean polizi edo espioitza lanak egitea bururatu zaie, euren lana guregain ipiniz.

Baina hori ez da dena. Teknologiaren inguruan Tor bezalako anonimizatzaileak erabiltzea, ordenagailuko pantaila edozeinek ikustea ekiditea edo pribazitatearen inguruan neurriak hartzea jokamolde susmagarri bihurtzen ditu. Ni neu beharbada terrorista izan niteke gida hau eskuetan hartuta.

Gero eta gehiago, sarea kontrolatuta egongo da zenbait industrien eta gobernuren interesak indartzeko. Ondorioz, gero eta gehiago erabiliko dira pertsonen eskubideak bermatzeko tresnak. Lan hau egin beharko luketen hoiek guztiz alderantzizkoa egiten badute, guri egokituko zaigu gure eskubideak mantentzea.

Horregatik agertzen dira FBIak ateratako gidaren antzeko ekimenak noizean behin. Gure eskubideak bermatzeko erabilgarriak diren tresnen gain konnotazio ezezkorrak ezartzea, hauek erabiltzen dituzten pertsonei zerbait ezkutatzen egotearen irudia ipintzeko.

Hacker hitzari egokitu zaion konnotazio negatibo eta okerra hartu daiteke adibide moduan. Gaur egun aipatutako hitza entzutean gizartearen portzentai oso handi batek delinkuentzia eta arriskua etortzen zaie burura, nahiz eta hitz horrek ez duen izatez kontzeptu hauekin zerikusirik.

Sarean dena ikusgarri egotea interesatzen zaie eta hori ekiditeko etqbili daitezkeen tresnak kriminalizatzea hartu dute helburutzat. Euren legeak onartzen ez dituen oro terrorista izan liteke, kontrolatzeko erraza ez den pertsona oro arriskutsua izan liteke.

Baina tira, lasai egon gaitezen, guk ez bait dugu ezer ezkutatzeko, ez?

The Pirate Bay webgunearen sortzaileak errudun

Orain dela bi urte hasitako epaiketa famatu bat bere amaierara iritsi da.  The Pirate Bay torrent tracker famatuak Suedian artista desberdinen jabego intelektualaren urratze akusazioak jaso zituen eta debora dexente pasatu eta gero kasu honen bukaera ezagutu da.

Epaia: errudun. The Pirate Bay sortu zuten lau pertsonek gartzela zigorrak jaso dituzte naiz eta kondena hau bete beharko ez dutela ematen badu ere.

Ikus entzunezko industriaren garaipen bat. Komunikabideetan bakarrik garrantzia edukiko duen garaipena, hori bai. The Pirate Bay webguneak sarean jarraitzen du eta munduko tracker famatuenetakoa da oraindik. Nahiz eta epaituak ez dauden gaur egun aipatutako webgunearen atzean, TPBko blogean beraien alde agertu dira. Momentuz beraz, ez du ematen gauzak asko aldatuko direnik copyrightaren munduaren inguruan.

Arlo honetan gertatzen diren albisteek gauzek bere horretan jarraitzen dutela frogatzen dute: noraezean dabilen industria bat egutegiak hamarkada bat atzeratzeko saiakerak egiten mundua orain dela asko beste bide batetik doan bitartean.

Betiko borroka.

The Promo Bay eta Paulo Coelho, kultura sustatzeko ekimena The Pirate Bayren partetik

Beste egunean The Pirate Bay webgune famatuan sartu nintzen, Megauploadekin gertatutakoa eta gero P2P sareak erabiltzera berriro animatuta.

Eta zein izan zen nire sorpresa Paulo Coelho idazlearen aurpegia torrent trackerraren orri nagusian ikusi nuenean. Dudarik gabe argazkia klikatu nuen idazlea piraten webgunean agertzeko arrazoia bilatzeko intentzioarekin, naiz eta banekien gutxi gora behera ildoa zein izango zen.

Ez nebilen oker: Coelhok bere liburuak deskargatzera animatzen du jende guztia, hau egiteak deskargatzeko eskuragarri dauden liburu hoien salmentak igoarazten dituela argi eta garbi daukalako. Ez da lehen aldia Coelhok gaur eguneko kulturaren egoerari buruzko iritzia ematen duena, eta aurrekoetan bezala internet erabilita bere sorkuntzen distribuzioarekin guztiz ados dago.

Beste aldean, The Pirate Bayko mutilak ditugu. Promo Bay izenpean artista desberdinak sustatzeko ekimena martxan ipini dute. Edozeinek egin dezake The Pirate Bay webguneko lehen orrian agertzeko eskaera, zenbait arau errespetatuta noski.

Modu honetan, euren edukiak lau haizetara zabaldu nahi dituzten idazle, banda edo filme egilek milioika begiren aurrean ipintzeko aukera lortzen dute. Azken finean hau da behar duten gauza bakarra, jendearen aurrean ezagutzera ematea. Zihur behin jendeak kultura sortzaile hauen gain begirada bat bota eta gero, euren edukiak kontsumitzera prest agertuko direla asko eta asko, eta hoietatik batzuk dirua ordaintzeko prest gainera.

Oso ideia ona, eta negozioa egiteko beste bide bat irekita.

Estekak:
    Sustatu: Paulo Coelho idazlea "pirateriaren" alde